ذبحتني واحيتني يا حبيبي
واضحكتني وابكيتني عند فرقاك
حقك علي يا زين حقٍ مْصيبي
وحقي عليك امسك يميني بيمناك
صواب قلبي من غرامك عطيبي
يا ليتنا .. ياليتنا ماعرفناك
ماظنتي جرح المحبه يطيبي
إن كان ما عالجت جرحي بلاماك
جرحي تجدد وا قرادة نصيبي
وانا من اول داله البال لولاك
لولا الحيا لا اصيح واشق جيبي
وازعل كثير الناس وادور رضاياك
جنسك قليل وشكل حبك غريبي
ماظنتي تصلح حياتي بلياك
طاريك عندي حاضرٍ ما يغيبي
بس اتخيل صورتك واتمناك
ماهمني غيرك بعيد وقريبي
لا والذي كمل جمالك وسواك
لو التمني للمولع يثيبي
قلت التمني دايم الدوم وياك